abwab

واش الزمان اصعاب ولا الناس اللي اصعابو

واش الحنان اتفقد ولا القلوب اللي دابو

واش الخوة مابقات ولا الخوت مع الزمان عابو

اللي تعيط ليه يقول ليك مشغول دابا حتى نعيط ليك

تتسنا تليفونو نهار،سيمانة ولا شهر وهومايعيط ولا يهنيك

قاع هدي خدما ولا الشيطان نعس القلب واصبح منو ليك

كلشي ملهي مع الزمان ومابقا عندك وقت لاختك ولاخيك

الوالدة تسول واش عيطي لخوك ولا هو عيط ليك

واش مشيتي شفتي اختك راها شادة غير فالله و فيك

باش تفرحها تقول ليها ايه كلشي بخير الوالدة

غير تهنا ي تيسلمو عليك و يقولو بغاو دعاويك الشديدة

والسبت ولا الحد يجيو يشوفوك ويديوك لسطاسيون طريق الجديدة

ساعة و لا ثلاثة و بعدها يمشو لهمومهم فحال القعيدة

و هي تبقا محروقة عليهم وتتسنى تلفوناتهم بلا فايدة

الله الله فين كنا و فين ولينا

العايلة تفقدات و مابقاو الخوت اولى لينا

كلها يغوت راسي والخرين يديهم الواد بعيد علينا

مابقات حنانا وصلة الرحيم غسلنا عليها يدينا

ولنا فحال الورق الريح اللي جا يدينا

بعدما كنا اصحح من الحديد مجموعين و مشادين بايدينا

وقتاش نفيقو من القلبة يا الخوت

الوقت زربان وكل اليوم فات يقربك من الموت

الخوة حدها الدنيا اللي غاديةو بنا تتفوت

البيضاء 25/06/2009

الكريدي هلكنا

اش كنسمع الافلاس ضرب الجيوب

الناس كترو الشرا و مالقاو حبوب

بغاو الدِار،الطموبيل،السياحة وحتى اللباس المقلوب

ماكرهوش يمشيو لفرنسا،لاسبانيا وحتى الجنوب

لكن المانضة على قد الحال،دغيا تدوب

البناك فرحو وبداو يصبغو بنادم ويدوزو عليه المرطوب

كلشي حللوه بالاشهاروالكدوب

بنادم داخ ومشى تيحبو فحال اللي دايرين ليه سبوب

تيغوت لكريدي هوالحل المكتوب

غير هاد المرةونتمناو الله علينا يتوب

الكريدي ولا ثلاثة ومن مانضتو صبح مسلوب

ومابقا عندو حتى فلوس المركوب
اصبح نادم لكن الله غالب ما عندو من هادالبلا هروب