abwab

ارفع رأسك انت كزاوي

تتفيق الصباح راسك تقيل ولسانك لاوي

باغي غير تتضارب مع اللي كان وخا ما معاك داوي

كافر على كلشي وكاسك شايفو كلو خاوي

ياويل اللي منك قرب قبل ما تعركها قهاوي

فالطوموبيل تتولي فحال الحمق مع راسك داوي

الحفاري تتيزيدو من شعلتك مللي فيهم تتطيح هاوي

المعيور ففمك ولا فحال المرض مايبرا وشحال تتداوي

الكلاكسون سبادة وعبادة وخا باش تتنساه انت ناوي

الضو الاحمر ديما حارقو وخا بالبروسيات الجيب كاوي

فالخدمة باغي غير تسالي باش تتبدى تتنمم فالصحيح واللاوي

الزمان مامعاونك وزايدها عليك الزحام, الغلا و الترام العزاوي

تتمنى من الله شي ربحا وبالتيرسي واللوطو ولليتي غاوي

الى فيك قاع هادشي واكتر اكيد انت كزاوي

البيضاء 02 ابريل 2012

خالتي قالو و الكرة

س : صباح الخير اخالتي,شتك مقلقة و عينك زرقة

خ ق : غير خليها على الله,شي يدي الفلوس او شي يكل الاعصا

س : ياك لاباس ؟

خ ق : البارح معا كان الماتش, الراجل والدراري قالو غيتفرجو مجموعين عند الجيران

س :ايوا اش طرا؟

خ ق : فالاول كلشي كان مزيان’ غير تمركا البيت الراجل شير على التلفزة ديال الناس

س : ومن بعد اش جرا ؟

خ ق : التلفزة تهرسات و بدا الغوات و المضاربة,جيت نفك جاتني بونية فعيني

س : اواه وباش ساليتوها’

خ ق : ساليناها فالكوميساريه,الراجل  بات تمة حتى يخلص ولا يسمح ليه الجار

س : وايلي قضية هادي,ايوا اش غتديري ؟

خ ق :اش عندي ما ندير, الله غالب, وحدين يشدو الملا ين و حنا يتشد لينا الراجل

س : كون غير بالفايدة, راها ملاين ضايعة,غادي نعيط واحد المحامي صاحبي باش يوقف معاكم انشاء الله.ما ترفدي هم اخالتي

خ ق : الله يوقف معاك اوليدي, و زيدون قلت ليهم بلا ما تمشيو راه النتيجة باينة. الله يهديهم ...

خالتي قالو و البغريرة الكبيرة

س : فين غبرتي علينا اخالتي قالو؟ ياك والو باس

خ ق: لا والو باس اولدي, يسول فيك الخير,غير سافرت لمراكش واحد السيمانا

س :هي شي عرس هدا؟

خ ق: فحال العرس ولكن ماشي عرس

س: شي حجاية جديدة هدي اخالتي ؟

خ ق: اوا اش غادي نقول ليك اولدي. راني مشيت نحضر لاكبر اومليت فالعالم

س :راكي تتهلكيني اخالتي,تبارك الله عليك. ايوا كيكان داك الشي ؟

خ ق :اش غادي نقول ليك, مزيان و خا القدية غالية بزاف

س :راها داخلا فالاشهار اخالتي

خ ق: اودي كون عطاو داك البيض لغير شي وحدين يسترزقو الله بيه

س : الرزاق الله اخالتي و زيدون راه خاص الخدمة ماشي البيض

خ ق : ملي كنت تنفرج جاتني فكرة, قلت خاصنا حتى حنا نصاوبو شي بغريرة كبيرة باش نتشهرو

س : ايوا كفاش غادي ديري ليها؟ خاصك الماتريال

خ ق : ران فكر فيها و قلت علا ش ما نشوفوش مع الشينوا يصوبو لينا شي مقلا كبيرة و حنا نصوبو المجمر

س : ايوا باش غادي تروحيها ؟

خ ق : العسل موجود ديال السكر غادي خص غير الزبدة

س :علا ش ما تشوفيش مع السوق الاوروبيه يسايفطو ليك شي طون ديال الزبدة

خ ق : لا لا اولدي كلشي عندهم حماض, غادي نديرو بناقص على الكوليسترول

ج : حتى هدا نضار اخالتي , ملي تحدي النهار قوليها ليا باش ندير ليك شويا الا شهار

خ ق : واخا ولدي , الكليان جاو دابا الله يعون